नेकपा एमालेका सांसद योगेश भट्टराईले संविधान बनाएको १० वर्ष बितिसकेकोले अब समीक्षा गर्ने समय आएको बताउनुभएको छ । शनिवार प्रतिनिधि सभा बैठकमा विनियोजन शिर्षकहरुमाथिको छलफलमा भाग लिँदै सांसद भट्टराईले संघीयताको कार्यान्वयनमा र बजेट कार्यान्वयनमा भएका कमीकमजोरीसँगै राम्रा पक्षका विषयमा समीक्षा गर्ने समय आएको बताउनुभएको हो । उहाँले नेपालको संविधान उत्कृष्ट बनाएको दाबी गरिरहेपनि अलिकति इमोशनल र दवावबाट प्रेरित हुनुपरेको स्मरण गर्नुभयो । तीन तहको सरकारले काम कसरी गरिरहेका छन्, कमी कहाँ छ ? त्यसबारेमा सोच्नुपर्ने समय आएको बताउँदै नेपालको जस्तो भूगोल भएको मुलुकमा ७ सय ५३ स्थानीय तह आवश्यक नभएको र करिब ५ सय स्थानीय तह बनाउनुपर्नेमा जोड दिनुभयो ।
